Oleiros, 12 de setembro de 2016-. O campo de fútbol municipal situado na urbanización dos Regos levará o nome de Leonardo Maceira. O venres ás 19:00 horas celebrarase un acto no propio recinto deportivo que servirá para realizar o cambio oficial na denominación do campo.
Este nomeamento parte dunha petición das entidades de Santa Cruz e, en especial, do equipo de fútbol da localidade que quixeron que o campo levase o nome dunha persoa que loitou durante toda a súa vida polo Santa Cruz Club de Fútbol. Leonardo Maceira desenvolveu ao longo da súa vida un traballo moi importante de fomento da práctica deportiva e desvelouse polo Santa Cruz C.F.
O Concello de Oleiros realizou un investimento de máis de 300.000 euros nas instalacións dos Regos para dotar o recinto de céspede artificial. O novo terreo de xogo será estreado o venres con varios encontros amigables entre os nenos dos equipos da localidade. O Santa Cruz C.F. e a A.D. Cristo Rey terán prioridade no uso desta instalación pública.