Concello de Oleiros

A tatuaxe debe o seu nome ao tatau polinesio que a tripulación europea do capitán Cook descubriu no século XVIII. A evolución desta práctica foi o resultado de intercambios entre países, entre correntes marxinais e dominantes, entre centros e periferias. Sobreexposta actualmente por mor do desenvolvemento de Internet e o interese mediático que esperta, a tatuaxe escribe a súa historia contemporánea ao ritmo dos avances tecnolóxicos.

A exposición Tattoo. Arte baixo a pel, que abrirá as súas portas este outono no Museo Centro Gaiás, segue a tatuadores e persoas tatuadas a través de épocas e continentes para explorar as confluencias que converteron a tatuaxe nunha forma de expresión artística e nun fenómeno global.

Producida polo musée du quai Branly – Jacques Chirac, a mostra reúne 240 obras históricas e contemporáneas procedentes de 18 países do mundo entre pinturas, debuxos, libros, modelos en silicona tatuados, ferramentas para tatuar, máscaras, fotografías, selos e nove audiovisuais. Está comisariada por Anne Richard, destacada axente cultural da arte europea de vangarda e fundadora da influente revista HEY! Modern Arte & Pop Culture.

Unha historia en evolución

Omnipresente en tempos pasados como elemento ritual nas sociedades tradicionais, foi erradicada pola colonización. Reducida en determinados países a unha función puramente punitiva e a pesar de converterse nun símbolo de marxinación, a tatuaxe conseguiu sobrevivir ata transformarse, no século XIX, en motivo de orgullo e material para o espectáculo. Xa no século XX, os intercambios internacionais iniciados por un grupo de tatuadores activistas deron lugar aos códigos e técnicas da tatuaxe contemporánea.

Ao longo deste percorrido polos seus usos rituais, máxicos e sociais, veremos que a tatuaxe se emancipou como práctica artística. Tattoo. Arte baixo a pel demostra a efervescencia dunha historia contemporánea en plena evolución. 

Artistas da tatuaxe contemporánea

Como novidade, Tattoo. Arte baixo a pel permite admirar obras dalgúns dos mellores artistas da tatuaxe actual nun formato innovador. A mostra expón unha vintena de modelos de silicona de partes do corpo humano, tatuados por mestres como Horiyoshi III, depositario do legado da tatuaxe tradicional xaponesa e o suízo Filip Leu, un dos tatuadores máis influentes e solicitados a nivel mundial, cunha lista de agarda de ata dez anos. Tamén pioneiras na introdución da cor no estilo hiperrealista, como a estadounidense Kari Barba, Paul Booth, creador de deseños escuros que seduciron a músicos de bandas de rock como Slayer, Slipknot, Lamb of God ou Sepultura ou o holandés Henk Schiffmacher (Hanky Panky), que tatuou a estrelas como Lady Gaga e os Red Hot Chili Peppers.

Estes modelos tatuados, encargados polo musée du quai Branly - Jacques Chirac ao longo do percorrido mundial que está a realizar a mostra, supoñen unha nova forma de conservar, estudar e apreciar a arte da tatuaxe.

Tras ser exhibida en Francia, Estados Unidos, Rusia, Canadá e Taiwán, chega a Galicia da man da Fundación Cidade da Cultura en colaboración coa Fundación “la Caixa”, convertida nunha das exposicións sobre tatuaxe máis completas e atractivas desenvolvidas ata o momento, unha proposta imprescindible para comprender a pulsión que leva ao ser humano a marcar con tinta o seu corpo.