Oleiros, 30 de marzo de 2023-. O Concello de Oleiros concedeulle unha mención honorífica ao axente da Policía local Juan Carlos Paz Viñas pola súa actuación extraordinaria no salvamento dunha muller nun intento de suicidio arroxándose desde o tellado dun edificio de tres plantas de Perillo o pasado mes de setembro. Nunha actuación de máis de 2 horas, xunto con Emilio Rocha Vilariño e dous axentes da Garda Civil do posto de Oleiros, en compañía dun traballador do 061, improvisaron un arnés cunha corda ao redor do corpo de Paz Viñas, que accedeu á cuberta do edificio, sen ser advertido pola rapaza, reptando sobre as tellas e abalanzándose sobre ela antes de que puidese saltar ao baleiro. Xa presa, o resto dos funcionarios policiais e máis o sanitario tiraron da corda arrastrando aos dous ao interior da vivenda. Como consecuencia desta manobra Juan Carlos Paz Viñas sufriu queimaduras no brazo esquerdo e un dos axentes da Garda Civil lesionou un brazo. A muller finalmente puido ser trasladada ao CHUAC.
