O alumnado elaborou máis de 300 lemas en galego para participar na Campaña polo 8M.
O Servizo de Normalización Lingüística do Concello de Oleiros convocou unha campaña polo Día da Muller, unha convocatoria de ideas dirixida á comunidade educativa do Concello de Oleiros co obxectivo de elaborar material divulgativo co gallo do 8 de marzo e para promover o uso da lingua. A campaña estaba dividida en 4 categorías, atendendo aos cursos escolares das persoas participantes. A primeira categoría para nenos e nenas de 5º e 6º de primaria, a segunda para alumnado de 1º e 2º de ESO, a terceira para 3º e 4º de ESO e a cuarta para mozos e mozas de bacharelato.
Presentáronse 173 lemas da primeira categoría, 5 lemas da segunda categoría, 47 lemas da terceira categoría e 87 da cuarta categoría.
Da primeira categoría escolléronse dous lemas, por unha banda, A igualdade é un camiño que deberiamos percorrer xuntos, de Martina Santomé García, de 6º B do CEIP Isidro Parga Pondal e pola outra, Como queres que gañe se non me deixas competir?, de Antón Castro Seijas, de 5º A do CEIP Luis Seoane.
Na segunda categoría resultou gañador o lema Mulleres xuntas. Futuro brillante, de Jorge Sánchez de la Fuente, Luís Quintero Fermín e Pedro Rodríguez Maceiras de 1º de ESO do IES María Casares.
Na terceira categoría escolleuse o lema Somos as sementes das árbores arrincadas, de Icía Velasco Rubira, de 3º B do IES María Casares
E por último, na cuarta categoría resultou vencedor o lema E ti de quen vés sendo? De min mesma, de Catalina Pier Vilariño, de 2º B bacharelato do IES Miraflores.
Con estes lemas imprimíronse mochilas e chapas e repartíronse entre o alumnado participante e entre a veciñanza nas actividades realizadas o 8 de marzo.