Concello de Oleiros

Se ben as persoas que viven en Santa Cristina e arredores da Avenida das Mariñas teñen moitísima facilidade para o acceso a praias e paseos, non era tan doado para quen vive na Canteira e a parte alta. Desde aló contan con rúas tranquilas para achegarse a Bastiagueiro a través do Bosque dos Veciños, a Santa Cristina baixando a Che Guevara, e ao paseo interior da ría a través do parque de Agramar.

O desdobramento do cruce do Areal, onde se atopaba o popular “Sol y mar” supuxo unha mellora da conexión peonil entre o alto de Perillo e a ribeira do interior da ría do Burgo. Tanto a rotonda que se creou para mellorar a vialidade do cruzamento entre Areal e As Mariñas como o paso peonil fronte ao parque de Agramar consiguen mellorar significativamente a circulación das persoas que desde Caavamontes, A Canteira ou Rosalía de Castro queren achegarse aos plácidos paseos que rodean a ría do Burgo.