Concello de Oleiros

A solución urbanística e arquitectónica é un notable exemplo de como poden facerse as cousas con agarimo e sensibilidade.

O reto era facer permeable un treito da Avenida da República Arxentina (AC173) moi próximo á urbanización Rialta e do principal eixo parroquial de Dorneda. Se ben na beira esquerda existe unha beirarrúa, na dereita o muro da histórica finca está literalmente pegado á calzada, facendo imposible a circulación peonil e ciclista.

A solución foi negociar coa propiedade para realizar un dobre muro, deixando a parte histórica como estaba, construíndo un muro tres metros dentro do predio e deixando como espazo público este corredor que ademais benefíciase da sombra e o agarimo e o arume das súas grandes árbores.
Camelios, magnolios, palmeiras e castaños ofrecen toda a súa xenerosa acollida ás persoas que camiñan, que dispoñen tamén dun pequeno espazo de relax, con bancos para o descanso.

Este pequeno treito que respecta as venerables pedras dunha herdanza fidalga supón a continuidade do eixo ciclopeonil que une Santa Cruz, Arillo e Mera en paralelo á estrada AC-173.