É o medio de transporte máis frecuente no noso municipio e ao que se dedica maior número de recursos públicos. O seu uso aumentou de xeito exponencial nos últimos anos, ata o punto de que en moitos lugares o seu abuso supón un problema grave con consecuencias na saúde da poboación e na funcionalidade do sistema viario.
O automóbil é un gran aliado das nosas vidas. Pero o uso frecuente do coche particular ten algunhas consecuencias pouco agradables, como os engarrafamentos relacionados cos accesos á ponte da Pasaxe. Agárdase que nos próximos anos o Estado aborde por fin a súa reforma.
Outros efectos negativos do abuso do coche é a escasa actividade física de boa parte da poboación, algúns problemas de convivencia entre coches, autobuses e persoas nas entradas e saídas dos colexios ou as friccións que se crean en determinados espazos de reducidas dimensións e alta demanda de aparcamento, especialmente no verán.
Como é frecuente na actualidade en toda Europa, as políticas públicas tenden a minorar o uso do coche particular, un obxectivo que adoitamos en Oleiros, con medidas adaptadas á nosa realidade de poboamento disperso e como parte importante da Área Metropolitana da Coruña.
Con todo, recoméndase, sempre que sexa posible, reducir ao mínimo o uso do coche, realizando a pe (ou en bici se é posible) os desprazamentos inferiores a 1 km.
